تأکید رهبران پاکستان و تاجیکستان بر تشکیل حکومت فراگیر در افغانستان

جمهوری مدارا: رهبران دو کشور پاکستان و تاجیکستان بر تشکیل حکومت فراگیر در افغانستان تاکید کرده‌اند.

شهباز شریف، نخست‌وزیر پاکستان و امام علی رحمان، رئیس جمهور تاجیکستان در یک اعلامیه مشترک تأکید کرده‌اند که تشکیل حکومت فراگیر در افغانستان مهم است.

این موقف رهبران هردو کشور پس از آن اعلام شد که شهباز شریف نخست وزیر پاکستان، در یک دیدار دو روزه به تاجیکستان رفته و با رئیس جمهور آن کشور دیدار کرده‌ است.

سران هردو کشور امروز چهار شنبه 13 سرطان و در پایان سفر آقای شریف، یک اعلامیه مشترک صادر کردند.

براساس اعلامیه مشترکِ سران هردو کشور، هردوجانب توافق دارند که افغانستانِ صلح‌آمیز و با ثبات، برای رفاه و پیش‌رفت منطقه مهم است و بدین جهت، رهبران هردو کشور به تشکیل حکومت فراگیر در افعانستان تأکید دارند.

داشتن حکومت فراگیر در افغانستان امری‌است که جامعه بین المللی، کشورهای همسایه و نیز جریان‌های سیاسی افغانستان همواره بدان تأکید کرده‌اند.

گروه طالبان اما که تاکنون در برابر این خواست مقاومت کرده و مدعی اند که حکومت آن‌ها فراگیر است.

اخیرا بررسی‌های تحقیقاتی انستیتیوت خاور میانه فاش کرده است که بیش از نود درصد رهبران و مسئولان حکومت طالبان از یک قوم تشکیل شده اند.

روابط کشورهای تاجیکستان و پاکستان، پس از روی کار آمدن گروه طالبان، هر از گاهی دچار تنش می‌شود.

نخست‌وزیر پاکستان در سفرش به تاجیکستان به مسئله‌ی تروریزم نیز اشاره کرده و هردو کشور تاجیکستان و پاکستان را قربانیان تروریزم خوانده است.

جنگ‌جویان گروه طالبان بارها در سرحدات مرزی بین افغانستان و پاکستان با نیروهای امنیتی پاکستان در گیر شده‌اند.